DR AYYATHAN GOPALAN
അയ്യത്താൽ ഗോപാലൻ അയിത്തതിനും അനാചാരത്തിനുമെതിരെ പോരാടിയ മലബാറിലെ ഈഴവൻ
........................................................................
കേരളത്തിലെ സാമൂഹ്യ നവോത്ഥാന നായകരിലൊരാളായിരുന്നു റാവുസാഹിബ് ഡോ. അയ്യത്താൻ ഗോപാലൻ മാർച്ച് 1861 - 2 മേയ് 1948). "ദർസർജി" എന്ന് അറിയപ്പെട്ടിരുന്ന നവോത്ഥാന നായകൻ. ഡോക്ടർ, എഴുത്തുകാരൻ, സാമൂഹ്യ പരിഷ്കർത്താവ്, മനുഷ്യസ്‌നേഹി എന്നി നിലകളിൽ പ്രസിദ്ധനായിരുന്നു അദ്ദേഹം. രാജാറാം മോഹൻറോയ് സ്ഥാപിച്ച ബ്രഹ്മസമാജത്തിന്റെ (1898) കേരളത്തിലെ നേതാവും, പ്രചാരകനുമായിരുന്നു. കേരളത്തിലെ സുഗുണവർധിനി പ്രസ്ഥാനത്തിന്റെ (1900) സ്ഥാപകൻ എന്നീ നിലകളിൽ അദ്ദേഹം അറിയപ്പെടുന്നു...
1861 മാർച്ച് മൂന്നാം തീയതി തലശേരിക്കടുത്ത്‌ അഞ്ചരക്കണ്ടിയിൽ
പുലപ്പാടി അയ്യത്താൻ" വീട്ടിൽ അയ്യത്താൻ ചന്തന്റേയും കല്ലാട്ട് ചിരുതമ്മയുടെയും മകനായി ഗോപാലൻ ജനിച്ചു. അദ്ദേഹത്തിന്റെ ഇളയ സഹോദരി ഡോ. അയ്യത്താൻ ജാനകിയമ്മാൾ, കേരളത്തിലെ മലബാറിലെ ആദ്യത്തെ വനിതാ ഡോക്ടറായിരുന്നു.
അഞ്ചരക്കണ്ടി എലിമെന്ററി സ്‌കൂൾ, തലശേരി ബ്രണ്ണൻ സ്‌കൂൾ, ബാസൽ മിഷ്യൻ സ്‌കൂൾ എന്നിവിടങ്ങളിലെ വിദ്യാഭ്യാസത്തിനുശേഷം മദിരാശിയിൽ മെഡിക്കൽ പഠനത്തിനായി അദ്ദേഹത്തെ അയച്ചു. സ്‌കൂൾ പഠനകാലത്തുതന്നെ യാഥാസ്ഥിതികത്വത്തോടും അനാചാരത്തോടും പോരാടുന്നതിൽ അദ്ദേഹം ഉത്സുകനായിരുന്നു. സാമ്പ്രദായികമായി തലമുടി വളർത്തി കുടുമയായി കെട്ടിവച്ചിരുന്ന യാഥാസ്ഥിതികരീതിയോട്‌ കലഹിച്ച്‌ സ്‌കൂൾ വിദ്യാർഥിയായിരിക്കെ ഗോപാലൻ കുടുമ മുറിച്ചു. കുടുംബത്തിലും സമുദായത്തിലും കോളിളക്കമുണ്ടാക്കിയ സംഭവമായിരുന്നു അത്‌. ഈഴവസമുദായാംഗമായ ഗോപാലൻ താഴ്‌ന്നജാതിയിലെ മുക്കുവ സുഹൃത്തിന്റെ വീട്ടിൽ കല്യാണത്തിനു പോയി ഭക്ഷണം കഴിച്ചെന്ന വാർത്ത തറവാട്ടു കാരണവരെ ക്ഷുഭിതനാക്കി. വീട്ടിൽ നിന്നിറക്കിവിട്ടതിനാൽ ഗോപാലന്‌ സ്‌കൂൾ മാറി പഠിക്കേണ്ടിവന്നു. മദ്രാസ്‌ പഠനകാലത്താണ്‌ അദ്ദേഹം ബ്രഹ്മസമാജവുമായും അതിന്റെ തത്ത്വങ്ങളുമായും ബന്ധപ്പെടുന്നത്‌. ആദർശങ്ങൾ പ്രസംഗിക്കാനുള്ളതല്ലെന്നും സ്വന്തം ജീവിതത്തിൽ പ്രാവർത്തികമാക്കേണ്ടതാണെന്നും അദ്ദേഹം ഉറച്ചുവിശ്വസിച്ചു.
ബ്രഹ്മസമാജരീതിയിൽ മാത്രമേ താൻ വിവാഹം കഴിക്കുകയുള്ളുവെന്ന്‌ അദ്ദേഹം ശഠിച്ചു. മദ്രാസ്‌ സംസ്ഥാനത്ത്‌ ബ്രഹ്മസമാജം അനുശാസിക്കുന്ന നിഷ്ഠകളോടെ നടന്ന ആദ്യ വിവാഹമായിരുന്നു ഗോപാലന്റേത്‌. വിശ്വവിശ്രുത സംസ്‌കൃത പണ്ഡിതനായിരുന്ന ഡോ. രാമകൃഷ്‌ണ ഭണ്ഡാർക്കർ ആയിരുന്നു വിവാഹകർമ്മത്തിന്‌ ആചാര്യനായിരുന്നത്‌. അക്കാലത്തെ ബോംബെ ഹൈക്കോടതി ചീഫ്‌ ജസ്റ്റിസായിരുന്ന മഹാദേവ ഗോവിന്ദ റാനഡെ വധൂവരന്മാരെ ആശംസിക്കാനെത്തിയിരുന്നു.
എല്ലാ ജാതിമതസ്ഥരേയും ഒന്നിപ്പിക്കുന്ന ഏകദൈവം എന്ന സങ്കൽപ്പത്തിലാണ്‌ മോഹൻറായ്‌ ബ്രഹ്മസമാജം സ്ഥാപിച്ചത്‌. അരൂപനും അനശ്വരനും അജ്ഞേയനും അവ്യയനുമായ ഏകദൈവത്തിൽ വിശ്വസിക്കുന്ന എല്ലാ മതക്കാരുടെയും സംഗമസ്ഥാനമായിരിക്കണം ബ്രഹ്മസമാജം എന്ന വീക്ഷണമാണ്‌ റായിക്കുണ്ടായിരുന്നത്‌. രാജാറാം മോഹൻറായിയുടെ മരണത്തിനുശേഷം ബ്രഹ്മസമാജത്തിന്റെ നേതൃത്വം ഏറ്റെടുത്തത്‌ ദേവേന്ദ്രനാഥ്‌ ടാഗോറാണ്‌. അദ്ദേഹത്തിന്റെ മകനാണ്‌ ഇന്ത്യയുടെ അഭിമാനമായ കവിയും ചിത്രകാരനും സംഗീതജ്ഞനുമായ രവീന്ദ്രനാഥ്‌ ടാഗോർ. ബ്രഹ്മസമാജത്തിന്റെ തത്ത്വങ്ങളും ആശയസംഹിതകളും ക്രോഡീകരിച്ച്‌ ബ്രഹ്മധർമ്മം എന്ന ഗ്രന്ഥം ദേവേന്ദ്രനാഥ്‌ ടാഗോർ ആദ്യം സംസ്‌കൃതത്തിലും പിന്നീട്‌ ബംഗാളിയിലും പ്രസിദ്ധപ്പെടുത്തി. ഇന്ത്യയിലെ പല ഭാഷകളിലും അതിന്‌ പരിഭാഷകളുണ്ടായെങ്കിലും ഈ മഹദ്‌ ഗ്രന്ഥം മലയാളത്തിലേക്ക്‌ മൊഴിമാറ്റി പ്രസിദ്ധീകരിച്ചത്‌ അയ്യത്താൻ ഗോപാലനാണ്. ബ്രഹ്മസമാജം കേന്ദ്രമാക്കിക്കൊണ്ടാണ്‌ അയിത്തോച്ചാടനം, അവർണ ജാതിക്കാരുടെ വിദ്യാഭ്യാസം, മിശ്രഭോജനം, മിശ്രവിവാഹം, ഏകദൈവ ആരാധന എന്നീ പ്രവർത്തനങ്ങൾക്ക്‌ ഗോപാലൻ തുടക്കം കുറിക്കുന്നത്‌. സവർണമേധാവിത്വം കൊടികുത്തിവാണിരുന്ന കഴിഞ്ഞ നൂറ്റാണ്ടിൽ അതിനെതിരെ പടനയിച്ച കർമ്മധീരനാണ്‌ അയ്യത്താൻ ഗോപാലൻ. മലബാറിലെ സാമൂഹ്യ പരിഷ്‌ കർത്താക്കളായി മാറിയ കല്ലിങ്ങൽ മഠത്തിൽ രാരിച്ചൻ മൂപ്പൻ, മിതവാദി സി കൃഷ്‌ണൻ വക്കീൽ, മഞ്ചേരി രാമയ്യർ, വാഗ്‌ഭടാനന്ദൻ, സാധു ശിവപ്രസാദ്‌ തുടങ്ങിയവർക്കെല്ലാം വഴികാട്ടിയായി മുമ്പേ നടന്നയാളാണ്‌ അയ്യത്താൻ ഗോപാലൻ. കൃഷ്‌ണൻ വക്കീലിന്‌ മിതവാദി പത്രം തുടങ്ങുന്നതിനുള്ള പ്രേരണയും ഉപദേശവും നൽകിയത്‌ അയത്താൻ ഗോപാലനാണ്. മലബാറിലെ ആബാലവൃദ്ധം ജനങ്ങൾ ബഹുമാനിച്ചിരുന്ന അയ്യത്താൻ ഗോപാലനെ സ്‌നേഹാദരങ്ങളോടെ സന്ദർശിക്കാൻ പോയതിനെക്കുറിച്ച്‌ വാഗ്‌ഭടാനന്ദൻ എഴുതിയിട്ടുണ്ട്‌. ബ്രഹ്മസമാജ പ്രവർത്തകർക്കുതകുന്ന പ്രാർഥനാഗീതങ്ങളും കീർത്തനങ്ങളും എഴുതിയതും ;ബ്രഹ്മമന്ദിരം എന്ന സ്ഥാപനം ആരംഭിച്ചതും എടുത്തു പറയേണ്ട കാര്യമാണ്.
അക്കാലത്ത്‌ അധഃകൃത വിദ്യാഭ്യാസത്തിനുവേണ്ടി മലബാറിൽ പോരാടിയിരുന്ന ഒരേയൊരാൾ അയ്യത്താൻ ഗോപാലനായിരുന്നു. കോഴിക്കോടുള്ള ലേഡി ചന്ദാവർക്കർ എലിമെന്ററി സ്‌കൂൾ ഡോ. അയ്യത്താൻ ഗോപാലൻ സ്ഥാപിച്ചത്‌ ഹരിജനങ്ങളുടെ വിദ്യാഭ്യാസ ആവശ്യത്തിനാണ്‌. അധഃകൃതരുടെ സാമുദായിക സംഘടനാപ്രവർത്തനം തുടങ്ങിയിട്ടില്ലാത്തകാലത്ത്‌ ഹരിജനങ്ങളെ അക്ഷരം പഠിപ്പിക്കാൻ മുന്നിട്ടിറങ്ങിയത്‌ അയ്യത്താൻ ഗോപാലനായിരുന്നു. ഹരിജനങ്ങൾക്ക്‌ റോഡിൽക്കൂടി സഞ്ചാരസ്വതന്ത്ര്യം ഇല്ലാതിരുന്നപ്പോൾ ചേവായൂർ കോഴിക്കോട്‌ റോഡിലൂടെ പറയരെ ഡോ. ഗോപാലൻ നടത്തിച്ചത്‌ അക്കാലത്തെ പ്രധാന സംഭവമായിരുന്നു. സവർണ മേധാവികളെ വെല്ലുവിളിക്കുന്ന ഇത്തരം പ്രവൃത്തികൾ ചെയ്യാൻ ഡോക്ടർ ഗോപാലന്‌ ഭയമോ മടിയോ ഉണ്ടായിരുന്നില്ല. കോഴിക്കോട്ടെ ചിത്തരോഗാ ശുപത്രിയിൽ അദ്ദേഹം ദീർഘകാലം സൂപ്രണ്ടായി സേവനമനുഷ്ഠിച്ചിരുന്നു. സെല്ലിൽ അടച്ചുപൂട്ടിയിടുന്നതുമാത്രം ചികിത്സാരീതിയായി കണക്കാക്കിയിരുന്ന അക്കാലത്ത്‌ ഭ്രാന്തന്മാരെ പുറത്താക്കി, അവരെ കായിക വിനോദങ്ങളിലേർപ്പെടുത്തി മനുഷ്യത്വം നിറഞ്ഞ ചികിത്സാരീതി കൊണ്ടുവന്നത്‌ ഡോ. ഗോപാലനാണ്. എതുസമയത്തും ഏതുരോഗിക്കും അദ്ദേഹത്തെ സമീപിക്കാമായിരുന്നു. വളരെ ദരിദ്രരും നിരാലംബരുമായ രോഗികളെ അവരുടെ വീട്ടിൽച്ചെന്ന്‌ ചികിത്സിക്കാൻ അദ്ദേഹം എപ്പോഴും തയ്യാറായിരുന്നു. ഡോ. ഗോപാലനാണ് . സാമൂഹ്യവും മാനുഷികവുമായ സേവനങ്ങളെ മുൻനിർത്തി 1917 ജൂൺ 4 ന്‌ ഗോപാലനെ ബ്രിട്ടീഷ് സർക്കാർ പരമോന്നത സിവിലിയൻ അവാർഡും പദവിയുമായ "റാവു സാഹിബ്" പട്ടം നൽകി ആദരിച്ചു.1900 ൽ ഗോപാലൻ, ഭാര്യ കല്ലാട്ട് കൗസല്യയുമൊത്ത് "സുഗുണവർധിനി പ്രസ്ഥാനം" ത്തിന് തുടക്കം കുറിക്കുകയും സാമൂഹിക പരിഷ്കരണ പ്രവർത്തനങ്ങൾ വിപുലീകരിക്കുകയും ചെയ്തു. ഈ പ്രസ്ഥാനത്തിലൂടെ,ബാലന്മാരിലും, വിദ്യാർത്ഥികളിലും മാനവികതയുടെ മൂല്യങ്ങൾ വളർത്തിയെടുക്കുന്നതിനും, സാമൂഹിക പ്രവർത്തനങ്ങളിലേക്ക് അവരെ ആകർഷിക്കുന്നതിനും, സ്ത്രീകളുടെ അവകാശങ്ങൾ സംരക്ഷിക്കുന്നതിനും, പെൺകുട്ടികൾക്കും, സമൂഹത്തിലെ പാർശ്വവത്കരിക്കപ്പെട്ട വിഭാഗങ്ങൾക്കും, പ്രത്യേകിച്ച് കേരളത്തിലെ ഹരിജൻ (ദലിത്) സമുദായങ്ങൾക്ക് സൗജന്യ വിദ്യാഭ്യാസം നൽകാനും അദ്ദേഹം പ്രവർത്തിച്ചു
അധഃകൃത ജനങ്ങളുടെ ഉദ്ധാരണവും സാമൂഹ്യ പരിഷ്‌ക്കരണങ്ങളുമായി മലബാറിലെ അവർണർക്കിടയിൽ ശക്തമായ പ്രചാരണങ്ങളുമായി അയ്യത്താൻ ഗോപാലൻ മുന്നോട്ടു പോയി താൻ വിശ്വസിക്കുന്ന ആദർശത്തിനൊത്തു ജീവിക്കുന്നതിൽ യാതൊരു വിട്ടുവീഴ്‌ചക്കും അദ്ദേഹം തയാറായില്ല. അയ്യത്താൻ ഗോപാലന്റെ ഏക പുത്രി സരോജഭായിയെ മംഗലാപുരത്തെ ബ്രഹ്മസമാജ പ്രവർത്തകനായിരുന്ന ശ്രീനിവാസ്‌ എന്നു പേരായ ഒരു ക്രിസ്‌ത്യൻ യുവാവാണ്‌ വിവാഹം കഴിച്ചത്‌. കൊച്ചി രാജ്യത്ത്‌ സഹോദരൻ അയ്യപ്പൻ മിശ്രഭോജന പ്രസ്ഥാനം ആരംഭിക്കുന്നതിന്‌ വളരെ മുമ്പൂതന്നെ ഡോക്ടർ അയ്യത്താൻ ഗോപാലന്റെ ഭവനത്തിൽ ഹരിജനങ്ങൾക്കെന്നു മാത്രമല്ല, സർവരും അകറ്റിമാറ്റിയിരുന്ന നായാടികൾക്കുപോലും വീട്ടിനകത്ത്‌ ഭക്ഷണം നൽകിയിരുന്നു. പുലയർക്കും പറയർക്കും നായാടികൾക്കും വെച്ചുവിളമ്പി ഭക്ഷണം നൽകുന്നതിൽ പ്രതിഷേധിച്ച്‌ വീട്ടിലെ ജോലിക്കാർ പോലും ജോലി ഉപേക്ഷിച്ച്‌ പോയിട്ടുണ്ട്‌. അയ്യത്താൻ ഗോപാലനും അദ്ദേഹത്തിന്റെ ധർമ്മപത്‌നി കൗസല്യയും ഇതെല്ലാം അവഗണിച്ച്‌ അവർണർക്ക്‌ വീട്ടിൽ ഭക്ഷണം നൽകിപ്പോന്നു എന്നകാര്യവും പരാമൃഷ്‌ടമാണ്‌. സാമൂഹ്യ പരിഷ്‌ക്കരണത്തിന്‌ എതിരായ ഗർഹണീയമായ സകല ആചാരങ്ങളോടും അയ്യത്താൻ ഗോപാലൻ കലഹിച്ചു. അക്കാലത്തെ ഏറ്റവും ഉയർന്ന വിദ്യാഭ്യാസവും ഔദ്യോഗിക പദവിയും ഉണ്ടായിട്ടും അധഃസ്ഥിതരുടെ ഉന്നമനത്തിനുവേണ്ടി ജീവിതം ഉഴിഞ്ഞുവയ്‌ക്കാനാണ്‌ അദ്ദേഹം ശ്രമിച്ചത്‌. അദ്ദേഹം കാലത്തിനുമുമ്പേ നടന്ന മഹത്‌വ്യക്തിയായിരുന്നു. അദ്ദേഹത്തെ ചരിത്രം വേണ്ടരീതിയിൽ രേഖപ്പെടുത്തിയിട്ടില്ലെന്ന കുറ്റബോധം നിലനിൽക്കുന്നുണ്ട്‌. മലബാറിൽ 1921 ൽ നടന്ന മാപ്പിള ലഹളയിലും അയ്യത്താൻ ഗോപാലൻ ധീരോദാത്തമായ പങ്കുവഹിച്ചിട്ടുണ്ട്‌. അയ്യത്താൻ കോഴിക്കോട്‌ ചിത്തരോഗാശുപത്രിയിൽ ഡോക്‌ടറായി ജോലി നോക്കുമ്പോഴാണ്‌ ലഹള പൊട്ടിപുറപ്പെടുന്നത്‌. തിരൂരങ്ങാടി, കോട്ടക്കൽ, മഞ്ചേരി, പെരിന്തൽമണ്ണ തുടങ്ങിയ ഭാഗത്തുനിന്ന്‌ അരലക്ഷത്തിലധികം ആളുകളാണ്‌ അഭയാർഥികളായി കോഴിക്കോട്ടെത്തിയത്‌. ഇവർക്ക്‌ സഹായമെത്തിക്കാൻ കോഴിക്കോട്ടെ പൗരമുഖ്യന്മാർ മുന്നോട്ടുവന്നു. ഡോ. അയ്യത്താൻ ഗോപാലൻ, മഠത്തിൽ കുഞ്ഞിക്കോരപ്പൻ, സി കൃഷ്‌ണൻ തുടങ്ങിയവരാണ്‌ ഇതിന്‌ നേതൃത്വം നൽകിയത്‌. ഡോക്ടർ ചിത്തരോഗാശുപത്രിതന്നെ ഒരഭയാർഥി ക്യാമ്പായി മാറ്റി. ഏറ്റവും ഫലപ്രദമായ അഭയാർഥി ക്യാമ്പിന്‌ നേതൃത്വം നൽകിയത്‌ ഡോക്ടറായിരുന്നു. 1948 ൽ ഡോക്ടർ അന്തരിച്ചു.
ഈഴവ / ഇല്ലത്ത് പിള്ളയാർ / തിയ്യ/ബില്ലവ / ഈ ഡിഗ / ഭണ്ടാരിetc ഈഴവ മഹാ വംശം .
അഭിപ്രായങ്ങള്‍
ഒരു അഭിപ്രായം പോസ്റ്റ് ചെയ്യൂ